[33] เหตุปจฺจยา นอารมฺมเณ จตฺตาริ, นอธิปติยา นว, นอนนฺตเร จตฺตาริ, นสมนนฺตเร จตฺตาริ, นอญฺญมญฺเญ ทฺเว, นอุปนิสฺสเย จตฺตาริ (สพฺพตฺถ จตฺตาริ), นสมฺปยุตฺเต ทฺเว, นวิปฺปยุตฺเต ทฺเว, โนนตฺถิยา จตฺตาริ, โนวิคเต จตฺตาริฯ

4. ปจฺจยปจฺจนียานุโลมํ

[34] นเหตุปจฺจยา อารมฺมเณ จตฺตาริ, อธิปติยา ปญฺจ (อนุโลมมาติกา กาตพฺพา)…เป.… อวิคเต สตฺตฯ

ทสฺสเนนปหาตพฺพทุกํ นิฏฺฐิตํฯ

84. ภาวนายปหาตพฺพทุกํ

1-6. ปฏิจฺจวาราทิ

1-4. ปจฺจยานุโลมาทิ

[35] ภาวนาย ปหาตพฺพํ ธมฺมํ ปฏิจฺจ ภาวนาย ปหาตพฺโพ ธมฺโม อุปฺปชฺชติ เหตุปจฺจยา (ยถา ทสฺสนทุกํ, เอวํ วิตฺถาเรตพฺพํ, นินฺนานากรณํ)ฯ

เหตุยา ปญฺจ…เป.… อวิคเต ปญฺจฯ

อนุโลมํฯ

ภาวนาย ปหาตพฺพํ ธมฺมํ ปฏิจฺจ ภาวนาย ปหาตพฺโพ ธมฺโม อุปฺปชฺชติ นเหตุปจฺจยา – อุทฺธจฺจสหคเต ขนฺเธ ปฏิจฺจ อุทฺธจฺจสหคโต โมโหฯ

นภาวนาย ปหาตพฺพํ ธมฺมํ ปฏิจฺจ นภาวนาย ปหาตพฺโพ ธมฺโม อุปฺปชฺชติ นเหตุปจฺจยา – อเหตุกํ นภาวนาย ปหาตพฺพํ เอกํ ขนฺธํ…เป.… (ยาว อสญฺญสตฺตา) วิจิกิจฺฉาสหคเต ขนฺเธ ปฏิจฺจ วิจิกิจฺฉาสหคโต โมโห (สํขิตฺตํ)ฯ

นเหตุยา ทฺเว…เป.… โนวิคเต ตีณิฯ

ปจฺจนียํฯ

(ปจฺจยวารปจฺจนีเย นเหตุปจฺจเย อุทฺธจฺจสหคเต ตีณิ, โมโห อุทฺธริตพฺโพฯ สพฺเพปิ วารา ทสฺสนทุกสทิสา, อุทฺธจฺจปจฺจนียมฺปิ นานํฯ)

7. ปญฺหาวาโร

1. ปจฺจยานุโลมํ

1. วิภงฺควาโร

เหตุปจฺจโย

[36] ภาวนาย ปหาตพฺโพ ธมฺโม ภาวนาย ปหาตพฺพสฺส ธมฺมสฺส เหตุปจฺจเยน ปจฺจโย – ภาวนาย ปหาตพฺพา เหตู สมฺปยุตฺตกานํ ขนฺธานํ เหตุปจฺจเยน ปจฺจโย… ตีณิฯ

นภาวนาย ปหาตพฺโพ ธมฺโม นภาวนาย ปหาตพฺพสฺส ธมฺมสฺส เหตุปจฺจเยน ปจฺจโย (สํขิตฺตํ)ฯ (1)

อารมฺมณปจฺจโย

[37] ภาวนาย ปหาตพฺโพ ธมฺโม ภาวนาย ปหาตพฺพสฺส ธมฺมสฺส อารมฺมณปจฺจเยน ปจฺจโย – ภาวนาย ปหาตพฺพํ ราคํ อสฺสาเทติ อภินนฺทติ, ตํ อารพฺภ ภาวนาย ปหาตพฺโพ ราโค อุปฺปชฺชติ, อุทฺธจฺจํ อุปฺปชฺชติ; ภาวนาย ปหาตพฺพํ โทมนสฺสํ อุปฺปชฺชติ; อุทฺธจฺจํ อารพฺภ อุทฺธจฺจํ อุปฺปชฺชติ, ภาวนาย ปหาตพฺพํ โทมนสฺสํ อุปฺปชฺชติ; ภาวนาย ปหาตพฺพํ โทมนสฺสํ อารพฺภ ภาวนาย ปหาตพฺพํ โทมนสฺสํ อุปฺปชฺชติ, อุทฺธจฺจํ อุปฺปชฺชติฯ (1)